Градоначалникот Никола Бакрачески, придружуван од директорите на јавните претпријатија и раководителите на секторите при локалната самоуправа, денес изврши обиколка на локациите каде во тек се градежни работи согласно годишната програма за работа.
Како што нагласи Бакрачески, намерата е на лице место да добие информации од надлежните служби околу интензитетот на изведувањето на градежните зафати.
– Извршивме увид на патот помеѓу Горно и Долно Лакочереј каде во тек е поставување на канализациона мрежа , по што ќе следи и асфалтирање на патот. Ја посетивме улицата „Петрино“ каде беше неопходно поставување на водоводна мрежа, по што ќе се врши тампонирање и асфалтирање. Не можевме да допуштиме да се манипулира со жителите и да се става асфалт врз неподготвена подлога, затоа прво извршивме целосно инфраструктурно комплетирање на улиците, па дури потоа ќе следи ставањето на асфалт . Слични зафати се вршат и на улица „Крум Точков“. Крајниот рок за завршување на подготвителните активности е 23 октомври, по што ќе следи асфалтирањето на овие три улици, изјави Бакрачески.
Градоначалникот потенцира дека најголемиот дел од градежните зафати сега ги вршат јавните претпријатија, а не како претходно,кога тие биле реализирани од страна на изведувачи избрани по пат на распишување на тендер.
– На овој начин се овозможува поголем прилив на средства во касите на јавните претпријатија со што се овозможува и редовна исплата на платите, рече Бакрачески.
Градоначалникот, директорите и раководителите го посетија и влезот во Охрид, каде несовесни граѓани постојано фрлаат големи количини градежен шут, изврши увид и на местата каде се врши чистење на каналите, а ја посети и улицата „Кеј Маршал Тито“ каде се врши уредување на тротоарите.Како што потенцира Бакрачески, ваквите обиколки низ Охрид во иднина редовно ќе се вршат најмалку еднаш во текот на месецот.
Т.К.
