По серијата откажувања со кои се соочи селекторот Марин Докузовски, челните луѓе на Македонската кошаркарска федерација, мораа да побараат надворешно решение за позицијата еден во репрезентацијата. 

Една од „опциите“ е Американецот Маркиз Грин (28), кој зад себе има извонредни настапи во првенствата на Франција, Турција и во Италија, каде што важи за еден од подобрите плејови последнава деценија.

– Ме контактираа луѓето од МКФ и јас одлучив дека е одлична можност да се приклучам на репрезентација, која ќе се натпреварува за учество на европскиот шампионат. Ги запознав репрезентативците и мислам дека се работи за квалитетен тим. Се надевам ќе успееме да стигнеме до целта – рече Грин по тренингот во Охрид каде нашиот тим се подготвува за августовските квалификации за ЕП 2011.

Грин е одличен плеј, во своите настапи во Евролига за Авелино имаше одлични 7 асистенции по натпревар, на кои придодава и 13,3 поени и 4 скока.

Тој истакна дека за него е голема чест што ќе игра за Македонија и дека ќе даде голем допринос да биде дел од ЕП во Литванија 2011 година.

– Не ги познавам останатите тимови, но тоа не ме интересира. За мене е најважно со работа да се наметнам кај селекторот. Играњето на ЕП е голема шанса за мене бидејќи ретки се кошаркарите кои добиваат можност да учествуваат на големи натпреварувања – завршува Грин.

фото Емилио
М.П.