Тоа што СДСМ има двојно, па и тројно водство, а што се виде во разговорите за продолжување со работата на Комисијата за настаните од 24-ти декември, е лошо за државата, изјави денес премиерот Никола Груевски.
„Во СДСМ еден човек издава една команда, а се случува нешто друго, а и тој самиот не знае што му се случило зошто тој вели да одат на десно, а тие одат на лево. Мене ми е жал што е тоа така, особено затоа што не можеме да завршиме некои значајни работи што се важни за државата и тоа што земјата може да има последици”,рече премиерот.
Груевски смета дека, нерешавањето на прашањето со Комисијата ќе се рефлектира во следниот извештај на ЕУ, а може да резултира и со недобивање препорака за почеток на преговори.
„Проблемите на СДСМ внатре во партијата директно ќе се рефлектираат на проблеми во државата, и тоа сериозни проблеми. Се надевам дека ќе се најде начин СДСМ внатре во партијата да се консолидира, да се договорат и да имаат едно водство во интерес на државата”, додава Груевски.
Според премиерот, со двојното и тројното раководење не само што СДСМ ќе има проблеми, туку ќе има и државата.
Претходно во понеделник, членот на комисијата од ВМРО-ДПМНЕ, Илија Димовски ги повика членовите предложени од СДСМ на средба, за да можат да продолжат со работата на комисијата, но од СДСМ, преку нивниот портпарол ја одбија неговата понуда.
извор: Макфакс
