Со постигнатиот договор за надминување на политичката криза Македонија положи сериозен испит на зрелост, изјави премиерот Никола Груевски во своето обраќање до јавноста.
-Наспроти сите случувања во изминатиот период, сите предизвици со кои заеднички се соочувавме, денес покажавме зрелост и наспроти сите песимисти, кои мислеа дека не можеме, односно дека грешиме кога нудевме различни опции и предлози, кога бевме спокојни и трпеливи, кога со принципи се спротивставувавме на хаосот што беше создаван, кога предложивме и продолжување на рокот за доставување на листите, или кога ја потврдив комисијата за расветлување на настаните од 24ти декември, за време на потпишувањето на нашиот коалициски договор пред неколку недели итн. Кога човек работи по принципи и со аргументи и кога верува во тоа што го прави, тогаш резултатите се неминовни, тогаш, решение секогаш се појавува.-рече Груевски.
Тој истакна дека на средбата кај претседателот на државата се постигнал договор за враќање на опозицијата во парламентот и за настап на предвидените локални избори, без притоа да има условувања за организирање на предвремени парламентарни избори, или одложување на локалните избори.
-Со ова државата избегна еден опасен преседан, кој можеше скапо да не чини не само нас како генерација, туку и следни генерации по нас, заради различни основи.- истакна премиерот Груевски.
Со цел, да нема забуна и погрешна, случајна или намерна погрешна интерпретација на она што е договорено, Груевски ги обзнани принципите од договорот кои, како што рече, ги штитат позициите за кои се залагавме:
• за враќање на нормалниот политички живот:
-сите партии да се вратат во Собранието и да учествуваат на закажаните локални избори.
• за изборниот календар:
-да се обезбеди соодветно време за регистрирање на кандидатските листи за локалните избори.
-да се оствари средба непосредно по локалните избори за да се разговара за внатрешно-политичката ситуација, вклучувајќи ги и наодите на Анкетната комисија за настаните од 24. декември, и да продолжат разговорите, со добра волја, за сите опции, и без прејудицирање за дефинирање на времето за одржување на следните парламентарни избори, врз основа на спроведувањето на препораките на ОБСЕ/ОДИХР, така што резултатите да може да се земат предвид во следниот Извештај за напредокот од страна на Европската Комисија.
Доколку се појават шпекулации или инсинуации во јавноста надвор од точките утврдени денес, кои ви ги доставуваме, а за кои сите заедно се сложивме, треба да е јасно дека тие се дел од нечија дневно – политичката реторика и не се точни.-потенцираше Груевски.
Тој истакна дека претстојните локални избори, ќе бидат организирани во фер и демократска атмосфера, согласно меѓународните стандарди, и дека владејачката коалиција за овие избори е максимално подготвена со свои програми и кандидати, и врз основа на тоа, очекува силна победа.
-Почнуваме со кампања, почнуваме со вистинските теми, кои се директно поврзани со решенија на дневните проблеми на граѓаните, за конкретни мерки, реформи, проекти кои треба да го подобрат животот на граѓаните, а не за баук теми од кои никој нема фајде и со кои некој сакаше подолго време да ја замајува јавноста. Продолжуваме со силно темпо, и ако досега бевме воздржани, дури и да не одржуваме митинзи, и не сакавме да бидеме злоупотребени за дневна политика било што и ако направиме, колку тоа и да е добро, сега ви најавувам, сега ќе видите што значат митинзи, што значи народ, што значи енергија и верба во нашата идеја, сега ќе видите што значи поддршка од народот и од каде ја црпиме нашата сила.-порача Груевски.
