На вчера одржаниот митинг во село Мешеишта, премиерот и лидер на ВМРО-ДПМНЕ Никола Груевски, ги повика жителите на општина Дебрца да му ја дадат подршката на кандидатот за градоначалник од коалицијата За подобра Македонија, Игор Трајкоски, нагласувајќи дека во текот на изминатите 16 години, не виделе реализација на ниту еден позначаен проект, освен бензинските пумпи во сопственост на семејството на актуелниот градоначалник Којчиноски. Груевски додаде дека време е Којчиноски да си замине и да дојде човек кој ќе работи, создава, ќе се грижи за општината и за граѓаните и ќе прави дела, човек кој има план и програма и со кој ќе можат да соработуваат.
Груевски информира дека во неговата програма предвидено е отворање на нова индустриска зона, која ќе овозможи инвестиции и отворање на нови работни места. Најави изградба на слободна економска зона, како и реконструкција на патот до Слиово, реализација на проектите за водоснабдување во селата Ботун, Требеништа, Волино и Климештани, изградба на регионален колекторски систем, реконструкција на резервоарот за вода во Лактиње, реконструкција на училишта, фудбалски игралишта, изградба на монтажни училишта.
Како што рече Груевски, ВМРО-ДПМНЕ е партија која дава ветувања и ги исполнува.
– И во минатото кога имавме програми најголемиот дел беа остварени, а беа реализирани и проекти кои ги немавме ветено, но сепак увидовме дека се потребни и ги реализиравме. Тоа е нашиот начин на работење. Ние почнавме да ја менуваме политичката култура во Македонија помина времето кога имаше градоначалници, политичари, премиери и министри кои само ветуваа и ништо не исполнуваа, рече Груевски.
Кандидатот за градоначалник Трајкоски во своето обраќање до жителите на Дебрца, истакна дека општината може и мора да биде препознатлива, а тоа според него, ќе се оствари со реализација на проектите од неговата програма.
Трајкоски рече дека со реализација на ветените проекти Дебрца ќе се најде на мапата на развиени општини. Вети дека доколку го добие градоначалничкиот мандат, од 7 април во Дебрца ќе почне препороднички процес со општината.
