Човечко и демократско право е да се протестира, но секој што ќе излезе да внимава и на својата одговорност, апелираше премиерот Никола Груевски по најавите за нови протести против апсењата на осомничените за петкратното убиство кај Смилковското езеро, јавува „Макфакс“.
Повикува на внимателност со цел да не се нарушува меѓуетничкиот и меѓурелигискиот соживот во земјата.
„Секој има право да протестира. Тоа е човечко и демократско право и од тој аспект јас немам ништо против утрешниот протест, меѓутоа, секој што протестира треба да внимава на сопствената одговорност, затоа што живее во едно демократско општество и треба да внимава да не подлегне под одредени манипулации или нечии туѓи агенди. Македонија е мултиетнички држава, мултиверска, мултиконфесионална држава. Живееме заедно и ќе продолжиме да живееме заедно. Треба да се мисли и на денот потоа, така што во тој поглед апелирам до секој од утрешните демонстранти, изразувајќи го своето мислење за тоа за што тој е излезен – да внимаваат и на својата одговорност. Секој има и лична одговорност во нашето општество, така што и тие луѓе што ќе протестираат и демонстрираат имаат лична одговорност за своите постапки, тие да бидат законски и да не го нарушуваат соживотот и меѓуетничкото и меѓуверското живеење што со векови егзистира на овој простор и ќе продлжи да егзистира во иднина“, изјави Груевски, по неформалните најави за нов собир во петок против апсењата за петкратното убиство.
извор: „Макфакс“
