Хеликоптери на армијата на Република Македонија во среда и четврток ќе им носат храна и лекови на жителите на отсечените села од општина Студеничани, Сопиште и Чучер Сандево, prenesuva „Макфакс“.
Храната ќе биде обезбедена од стоковите резерви и резервите на одбраната. Екипи на Црвениот крст, пак, ќе им однесат пакети за лична хигиена на жителите.
Оваа одлука беше донесена на првата седница на Координативното тело составено од владини министри, претставници на најзагрозени општини и институции надлежни за справување со кризи.
Дополнително, исто така, ќе се активираат поголем број градежни компании кои ќе се вклучат во расчистување на локалните патишта. Во овие два дена, до петок, додека не заврнал повторно снег, ќе се расчистуваат непроодните локални патишта до селата во 15 општини.
„Апелирам до локалните самоуправи да ги вклучат сите расположливи сили и силите за заштита и спасување за расчистување на локалните патни правци“, рече министерот за транспорт и врски, Миле Јанакиески.
Координативното тело составено од владини министри, претставници на најзагрозени општини и институции надлежни за справување со кризи денеска ја одржува првата седница, а ќе продолжи да се состанува секојдневно.
Според податоците на Центарот за управување со кризи, отсечени се околу 40 села, завеани се илјадници жители, а најзагрозени региони се скопскиот, прилепскиот и кумановско-липковскиот регион.
