Менаџерот на Ливерпул, противникот на Работнички во третото коло во квалификациите за Лига Европа, Рој Хоџсон, вели дека сторил се што е во негова моќ да го задржи Фернандо Торес во клубот и истовремено порачува дека не гледа оптимистички за останување на шпанскиот репрезентативец на „Енфилд Роуд“.

„За жал не можам да сторам повеќе. Неговата судбина сега е во рацете на клубот“, рече Хоџсон.

Шпанскиот фудбалер се чувствува измамен бидејќи од клубот добил ветување дека ќе се вложат екстра пари за засилувања со што лани го придобија да го продолжи договорот. Но, од нови големи имиња меѓу „црвените“ нема ништо и тоа е главната причина која го принудува Торес да размислува за заминување.

„Ситуацијата на Торес нема никаква врска со мене, тоа јасно ми го кажа во телефонски разговор за време на Светското првенство, а и подоцна кога се видовме во четири очи. Знае какви се моите планови, знае колку го ценам. Но, го измачува тоа што било претходно и малку го интересира иднината. Ако во минатото имал проблеми во клубот, јас тоа тешко можам да го поправам“, се жали Хоџсон.