Убавините на Охрид, Манастирскиот комплекс „Свети Наум“ и Охридскиот бисер ќе бидат дел од кратките промотивни филмови за Македонија кои ќе започне да ги снима Холивудската продуцентска компанија „Infinity pictures and HMB (Hollywood Media Bridge). Ова е дел од промотивните активности на Агенцијата за промоција и поддршка на туризмот, кои се предвидени за оваа година.

Холивудската продуцентска екипа ќе престојува во посета на Македонија од 24-ти август до 10-ти септември.  

-Во Македонија ќе дојдат репортерот Перси Вон Липински, филмските продуценти Филип Голдфајн и Тимоти Марлоу, снимателот Роб Хабер и новинарот Жаклин Винзелберг. Ќе треба да се снимаат петнаесет кратки промотивни филмови за Македонија кои ќе се емитуваат на пет странски јазици на You Tube канал, а ќе бидат промовирани и на социјалните мрежи ширум светот и на познати светски медиуми, информираат од АППТ.

Според планираното, освен Охрид, во промотивните филмови ќе се прикажат и туристичките богатства на Скопје, Старата скопска чаршија, археолошките локалитети во околината на Скопје како и македонскиот рубин и филигранството.

-Ќе биде опфатена и приказната за природните убавини на кањон Матка и пештерата Врело, како и Маврово, Галичник, Јанче, Лазареполе и манастирите „Св Јован Бигорски“ и „Рајчица“. Ќе се посетат Крушево, Прилеп, манастирот „Трескавец“, а во промотивните спотови ќе се опфати и Дојранското Езеро и ловењето риба со корморани. Исто така ќе се посети и винскиот регион во Македонија, како и Берово, Куклици и Кокино, појаснуваат од АППТ.

Перси Вон Липински е поранешен дипломат, наградуван новинар на CNN познат како „CNN Travel Guru”, а во последниве години работи за „Universal Studios“ во Холивуд како „ловец на атрактивни локации” за промовирање и развивање на филмски туризам. Тој има работно искуство на повеќе од 200 инфо тури низ светот.  

Филип Голдфајн е филмски продуцент, добитник на Оскар познат по филмовите: Disturbing Behaviour, Half Past Dead, The Dentist, The Patriot, The Keeper, The Traveller, The Outsider, Legend, Badge of Honor. Основач е на продуцентската компанија HMB (Hollywood Media Bridge) која соработува со Холивудските студија: Warner Bros. MGM, Paramount, Universal Studios, Sony Pictures, Twentieth Century Fox, Lions Gate Entertainment, Anchor Bay/Starz, Image Entertainment.

Тимоти Марлоу е добитник на престижната награда Оскар и работи во филмскиот бизнис од 11 години, тој е извршен продуцент филмовите на: Legend, Badge of Honor, The Lady in number 6, The Cycle, Giganthropithicus и други.

Роб Хабер е камерман и до сега работел на некои од најголемите филмови во Холивуд, вклучувајќи ги: Badge of Honour, War of the Worlds, Raid on Entebbe, The English Patient и други.

OhridNews