Општина Охрид влегува во нова фаза на реализација на проектот за енергетска ефикасност во основните училишта „Христо Узунов“ и „Братство Единство“ во Лескајца по усвојувањето на новата одлука на одржаната последна седница на Совет со цел надминување на административните и технички пречки.

Во барањето за задолжување направени се прилагодувања кои се однесуваат на мерките за енергетска ефикасност кај вкупно два објекта, за разлика од претходно предвидените три во кое беше вклучено и ОУ „Свети Климент Охридски“. Измени се направени и во однос на периодот за реализација на проектот, па наместо предходниот рок 1 септември 2031, е внесен 30 септември 2027 година. Во oдлуката извршена е и техничка исправка, па рокот на отплата наместо претходните 7, сега изнесува 5 години.

Претходниот обид за реализација на овие задолжувања беше закочен поради неколку клучни фактори, меѓу кои проблеми со елаборатите за заштита за основното училиште „Свети Климент Охридски“ кои неколку пати беа одбивани од надлежните институции, како и нерешен административен проблем во Министерството за финансии поврзан со евидентиран јавен долг кој административно не бил затворен иако реално не постоел како активен долг, поради што не беше можно реализацијата на проектот, односно Светска банка не го прифати тоа, објасни Јоне Станкоски од Сектор за јавни дејности.

​Со новата одлука се врши издвојување на ОУ „Свети Климент Охридски“ кое понатаму ќе биде вклучено и ќе се аплицира во новоотворен фонд за енергетска ефикасност кој е во склоп на Развојна банка на Република Македонија со поповолни услови од овие сега што ги имаме за двете други основно училишта, односно од 12 години рок на отплата и 3 години грејс период без сопствено учество. И таму е планирана целосна енергетска ефикасност на училиштето. Меѓутоа не добива надворешна фасада затоа што е во заштитено јадро, внатрешно ќе се врши изолирање на ѕидовите, кровот и нов систем за греење, појасни Станкоски.

Воедно потенцираше дека со новата одлука општина Охрид нема да има сопствено учество и за ОУ „Братство Единство“ и за ОУ „Христов Узунов“.

Значи со претходната одлука издвојувавме 20% од севкупната сума на финансиски средства кои што беа потребни за реализација на проектот. Во овој момент нема да одвоиме воопшто наши финансиски средства туку вкупната инвестиција на двете училишта е од 42.089.697 денари од кои 11.993.322 опфаќа ОУ „Христов Узунов“, 30.086.375 денари реконструкцијата на ОУ „Братство Единство“ во Лескајца. 80% од овие финансиски средства се заемски средства односно земаме кредит од 33.663.758 и 20% од овие финансиски средства се грант, за разлика од претходно каде имавме и сопствено учество, додаде Станкоски.

Со проектот во ОУ „Христо Узунов“ опфатени се нова термичка фасада, фарбање на внатрешните ѕидови со масна боја во висина од 1,20 метри, термичка изолација на кровот, поставување ново греење во тоалетите и во фискултурната сала, како и поставување на динамички термостатски вентили и ново LED осветлување во целото училиште, внатре и надвор.

Во ОУ „Братство Единство“ во Лескајца предвидено е поставување на топлинска изолација на надворешните ѕидови, на покривот и на покривот од фискултурната сала, поставување на нови ПВЦ прозори со метални рамки и замена на старите прозори во училиштето и во фискултурната сала, поставување топлинска изолација на подот од фискултурната сала, како и поставување на нов систем за греење со топлински пумпи на постоечките мрежи со грејни тела при што постоечкиот систем за греење се зачувува како резервна варијанта.

Н.С.Ј.