Инвеститорот кој ќе пројави интерес да направи современ хотелски комплекс од хотелот Палас ќе може да изврши санациони зафати врз објектот, но не и доградба или надградба. Како што информира Тања Паскали Бунташеска, директорката на НУ Завод и музеј, под чија заштита е објектот, целта е да се заштити намената на објектот кој со децении важеше за еден од најубавите хотели на охридската ривиера.
– Тоа што го заштитивме објектот не значи дека од Палас ќе правиме музеј. Ќе одобриме секакви санациони мерки, значи надворешно, полирање на мермерната фасада, промена на столарија , внатрешно секакви промени кои инвеститорот смета дека треба да ги направи за објектот да стане современ хотел. Исто така дозволуваме и партерно уредување на просторот пред хотелот, дури и изградба на базен и сите потребни содржини, вели Паскали Бунташеска.
Инвеститорот согласно насоките од Завод и музеј ќе треба да изврши и промена на фасадата на доградениот ресторан во рамки на комплексот, која ќе биде во согласност со фасадата на останатите објекти.
Хотелот Палас кој години наназад стои запуштен, е меѓу локациите кои од страна на локалната самоуправа им се нудат на потенцијалните инвеститори, а се содржани во неодамна промовираната брошура „Инвестирајте во Охрид“.
Од локалната самоуправа потенцираа дека намерата е на оваа локација да и се врати некогашниот сјај со изградба на современ туристички комплекс. За таа цел, во текот на изминатите неколку месеци вршени се интензивни преговори со претставници на акционерското друштво кое е сопственик на објектот, со кои заедно биле разгледувани плановите за понатамошната судбина на Палас.
Т.К.