Според најновата анкета на Американскиот републикански институт – ИРИ, владејачката ВМРО-ДПМНЕ има поддршка од 38 проценти од испитаниците, додека опозицискиот СДСМ доби девет проценти. Коалициониот партнер во власта – ДУИ доби 11 отсто доверба, за ДПА би гласале два процента од граѓаните, додека партијата на Имер Селмани, Нова демократија доби 3 отсто поддршка од испитаниците, покажува анкетата на ИРИ. За ДОМ и за НСДП се изјасниле по еден отсто од анкетираните, два процента од нив би гласале за други партии, додека процентот на неопределените е 18 отсто.
Најголем рејтинг и натаму има актуелниот лидер на ВМРО-ДПМНЕ и премиер Никола Груевски со 31 процент, а втор на листата на политичари од доверба е Али Ахмети со осум проценти. Шефот на државата Бранко Црвенковски ужива рејтинг од седум проценти. Од досега најавуваните личности како можни идни кандидати за претседател на државата, за Љубе Бошкоски и Имер Селмани се изјасниле три проценти, а за Срѓан Керим два отсто од анкетираните.
Граѓаните и во оваа анкета повторно дадоа висока поддршка за членството на Македонија во ЕУ со 92 и во НАТО со 89 отсто.
Ohridnews
