Амбициозно најавена пред петнаесеттина години, Источната обиколница на Охрид, на потегот од бензинската пумпа на „Макпетрол“ – Билјанини извори, до 110-киловолтниот далновод на ЕВН, која значитено треба да го растовари сообраќајот, особено во летната сезона, никако да се догради.
Во меѓувреме се донесоа ДУП-ови, разни плански урбанистички решенија со кои во месноста бејбунар никнаа десеттина, а се планираат најмалку уште два пати толку згради, но главната сообраќајна артерија кој треба да овозможи непречени движење на возилата и луѓето на овој простор се уште чека на реализација.
Наместо модерно сообраќајно решение, овој простор со години се полни со шут и најразличен друг отпад, и покрај фактот што тука има каптажи и извори со питка вода за кои постои голем сомнеж дека се загрозени со урбанизацијата на Бејбунар.
Иако не е изградена, источна трансферзала уште во 2009 година со одлука на општинскиот совет доби свое име – Јордан Мијалнков, во чест на првиот Министер за внатрешни работи во самостојна Македонија кој настрада во сообраќајна несреќа на почетокот од деведесеттите години.
Оттогаш се променија пет градоначалници, а освен делумни зафати нема поголеми поместувања во изградбата на сообраќајницата. Во 2016 година Советот на општина Охрид донесе одлука за долгорочно домашно задолжување во рамки на проектот за подобрување на општинските услуги (МСИП 2), наменето за комплетна реконструкција на три клучни сообраќајници во градот, улиците „Абас Емин“, „Јане Сандански“ и „Јордан Мијалков“, заедно со приклучокот на улицата „Карпош Војвода“.
Последните активности на улицата „Јордан Мијалков“ почнаа деновиве. Се работи за парцијален зафат за офомување на пристапот на на улицата.
Тоа значи поставување на рабници во прва фаза, а во втора фаза асфалтирање на дел од улицата. Согласно предвиденото се планира да се асфалтираат околу 1300 м2 површина. Тоа ќе овозможи непречен пристап преку улицата до станбените згради. Средствата за оваа активност се обезбедени од буџетот на Општина Охрид.- информира градоначалникот на Охрид Кирил Пецаков.
На улицата „Јордан Мијалков“ претходно, оваа пролет, беше изграден потисен цевковод во должина од 300 метри, вреден 5 милиони денари, исто така обезбедени од буџетот на Општина Охрид.
Дали и кога се планира целосно завршување на оваа сообраќајница, засега нема конкретна најава.
Г.М.
