Изложба на Владимир Младеновски по повод пет децении ликовно творештво во четврток со почеток од 19:30 часот на Кејот пред Центарот за култура „Браќа Миладиновци“ во Струга.
На изложбата ќе бидат претставени 30-тина дела со мотиви од Струга и струшко, пејзажи и староградска архитектура. Најголем дел од неговите слики се со маслени бои на платнени подлоги и имаат впечатливо лапидарна колористика, непроѕирност од складни преливи, најчесто од црвени, жолти, зелени и сини партии.
Во делата на овој македонски сликар, роден во струшкото село Подгорци, пулсира родниот крај каде се овековечува блесокот на боите со сета природна раскош и божја убавина. Студиозно им приоѓа на просторите, објектите, предизвиците и осмислено ги актуелизира најскапоцените и најсуштествените пораки и факти пренесени на платно, информираат од Центарот за култура.
Со сликарската четка на Младеноски опфатени се играта на природата, вистинитоста на животот, старите улици, игрите на сонцето и темнината, моминските солзи, она што плаче и пее, она што се раѓа низ времето и просторот.
OhridNews
