Износот за добивање на картица за влез во стариот дел од градот со одлука на Општина Охрид ќе биде целосно субвенциониран од страна на општината, информираат од ЈП „Билјанини Извори“.
Сите ониe кои до сега извршиле уплата за добивање на картица износот целосно ќе им биде рефундиран. Поради тоа ги молиме сите кои веќе уплатиле од утре да дојдат во просториите на ЈП „Билјанини Извори”, спортска сала „Билјанини Извори”, велат од претпријатието.
Претходно во допис до медиумите дел од жителите од овој дел од градот реагираа на одлуката на локалната самоуправа повторно да поднесуваат барање и да уплаќааат за картички за да можат како што велат да си дојдат дома. Бараа средба со Градоначалникот и директорот на ЈП „Билјанини Извори“ и најавија собирање потписи против одлуката.
Реакции следеа и на социјалните мрежи каде граѓаните се согласуваат дека е потребно да се регулира сообраќајот, но и да се дозволи паркирање само за тие кои се со адреса на живеење во овој дел.
- Регулиран сообраќај ДА! Рампи ДА! Ама картички без плаќање! И картички исклучиво за жителите на Варош, Месокастро, таксистите и интервентните служби! Забрана за паркирање на сите улици! Единствено место во светот сме каде што Стариот дел на градов е паркинг без пари!
- Сите си направија апартмани, гостите автомобилите ги паркираат по улици, а за мештаните тоа е најголемиот проблем. Тотален хаос. Треба забрана за влез со автомобили во Стар град освен за жителите, како што е секаде во вакви градови.
- Да се најди решение за паркирање на жителите и да се забрани секаков сообраќај во стар град.
- Паркинг дозволен само за жителите кои се со адреса во Варош, а за гостите и туристите сместени дозволен ограничен влез на пример еден час колку да можат да се истовараат со куфери или ако пазареле и да се размислува за катни гаражи, па макар и монтажни…тука се европските фондови.
Инаку, издавањето на картички за движење во овој дел од градот почна денес, а истите ќе бидат со примена од 26 јуни.
Н.С.Ј.
