Изградбата на автопатот од Кичево до Охрид и патот Охрид – Св. Наум, се приоритетни инфраструктурни проекти што треба да се реализираат преку соработка и поддршка со Владата на Народна Република Кина.  – изјави вчера Министерот за транспорт и врски, Миле Јанакиески, при потпишувањето на меѓудржавниот договор со Амбасадорот на НР Кина.

Ресорниот министер ги прецизира детали за оваа инвестиција, а паралелно ќе се работи на изградбата на сите планирани делници. „Најбргу може да се почне со автопатот Миладиновци – Штип за кој веќе е изготвен финален проект. На ниво на автопат ќе биде и патот Кичево – Охрид, за кој исто така веќе се изготвени проекти, а за патот Охрид – „Св. Наум“ во наредните две години, Агенцијата за државни патишта треба да изготви проектна документација.“ 
– потенцира Јанакиески.

Делниците низ земјава ќе бидат финансирани преку кредитни линии од кинеската влада, а дел од 10-те милијарди евра наменети за развој на Југоисточна Европа, ќе бидат искористени во овие проекти. „Владата на НР Кина најави фонд од 10 милијарди евра наменети за развој на земјите од Југоисточна Европа, со цел развој на инфраструктурата. Дел од тие пари ќе бидат искористени за патот Миладиновци-Штип, а во иднина ќе бараме друг начин на финансирање. Во случајов се работи за многу поволно кредитирање од кинеската Ексим банка, а динамиката на тие проекти  ќе биде согласно Стратегијата за надворешниот  долг на Република Македонија.“ – истакна Јанакиески.

OhridNews