Проблемите на пресекот од улиците „Питу Гули“, „7-ми Ноември“ и „Кленоец“ во непосредна близина на градската автобуска станица, локалната самоуправа планира да ги решава со пренасочување на сообраќајот.
-Во моментов се изработува идејно решение за пренасочување на сообраќајот со што ќе го избегнеме сегашното вкрстосување на улиците. Можно е дел од нив да станат еднонасочни, а ќе воведеме и пешачки острови“, вели советникот за сообраќај во локалната, Зоран Шикалоски.
Новото идејно решение ќе биде ставено на разгледување пред градските советници по што се очекува негова реализација.Со намера да се надминат сообраќајните проблеми на овој потег локалната пред три години најави изградба на кружен тек, но тој проект не се реализиара.
-За да изградиме кружен тек неопходно е преместување на бензинската пумпа на „Макпетрол“. Неколку пати до нив писмено се обративме да најдат нова локација. Дури пред отворањето на станицата на „Лук Оил“ им го понудивме тој простор, но тие не прифатија. Се додека бензинската е тука ние не можеме да го изградиме кружниот тек, истакнува Шикалоски.
Во моментов просторот каде се вкрстуваат улиците: „Питу Гили“, „Кленоец“ и „7- ми Ноември“, е една од најкритичните сообраќајни точки. Станува збор за мошне фреквентен пат и во лето и во зима со оглед на тоа што од тука минуваат сите автобуси од станицата, сите возила кои доаѓаат или одат за Битола и Ресен. Гужвата на овој патен правец станува уште поголема со започнувањето на учебната година кога тука минуваат стотици ученици од ЕМУЦ “Св. Наум Охридски“.
А. Белевска
