Специјалното јавно обвинителство наскоро јавно ќе ја обелодени својата одлука за случајот „Пуч“ откако ќе заврши увидот на тимот на Јанева во списите на предметот кои се наоѓаат во кривичниот суд, јавува Тв Телма. Денеска бил извршен двочасовен увид во судот во Скопје. Бидејќи се работи за голем обем на докази од повеќето се хартии и документи увидот ќе трае подолг периот и ќе се врши повеќе пати, појасни обвинителката Ленче Ристовска.

Оваа процедура специјалното обвинителство мора да ја заврши пред трети март за кога е предвидено продолжение на судскиот процес Пуч во кој првообвинет е лидерот на СДСМ Зоран Заев. Токму главната обвинителка Јанева побара одложување на рочиштето заради запознавање со доказите. 

Во меѓувреме на адреса на СЈО пристигна нова кривична пријава од физички лица за кривично дело малтретирање во вршење на службата. Информацијата ја потврдуваат од Основното јавно обвинителство, пренесува „Макфакс“. 

Со претходните пријави досега се поднесени вкупно шест пријави против обвинители во новото обвинителство, една од кривичните пријави е против три познати лица, обвинители и неколку непознати лица, три од кривичните пријави се против неколку непознати лица и две од кривичните пријави се против двајца обвинители и неколку непознати лица.

Во Основното јавно обвинителство за гонење на организиран криминал и корупција е поднесена една кривична пријава против едно лице, вработено во Министерството за внатрешни работи, за строено кривично дело, незаконито влијание врз сведоци.

„Поднесените кривични пријави се распределени за натамошно постапување кај надлежни обвинители“, соопштуваат од Јавното обвинителство.

Од Специјалното јавно обвинителство за Макфакс изјавија дека обвинителите постапувале согласно законските овластувања и најавуваат дополнителни информации на прес конференција.

Специјалната јавна обвинителка, Катица Јанева во понеделникот се повика на демантот од Обвинителството и не прецизираше дали навистина сведоците во Обвинителството се испрашувале без адвокат и нивните искази не биле снимани.

„Предистражаната постапка е тајна и сите сведоци кои се сослушани и кои ќе бидат сослушани ќе бидат предмет на оценка на судот кога ќе се отворат истражните постапки“, рече Јанева.

Според дел од експертската јавност, поднесувањето на кривични пријави претставува своевиден притисок врз СЈО, други пак сметаат дека демократско право на секој граѓанин е да поднесе кривична пријава доколку смета дека се загрозени неговите човекови права.

OhridNews