Дел од жителите на населбата Радојца Новичиќ се жалат дека повеќе од еден месец не функционира канализацискиот систем. Заради зголеменото ниво на подземните води, шахтите на улицата Радојца Новичиќ (од Лакочереј до пумпната станица во населбата) се полни со вода, со што е спречен прифатот на фекалните води на повеќе од 200 домаќинства, велат за OhridNews, граѓани од населбата.
Месното население стравува дека со покачување на дневните температури може да дојде до појава на зараза затоа што дел од домаќинствата се поплавени со фекалии, кои се враќаат во дворовите и објектите. Засега секој се снаоѓа како знае и умее. Оние кои имаат можност привремено ги напуштаат своите домови, додека останатите се надеваат на помош од надлежните кои по пријава на граѓаните ја согледале ситуацијата.
Населбата Радојца Новичиќ е една од поголемите населби во Охрид. Во неа живеат над 2000 жители во повеќе од 400 домаќинства. Најголемиот дел од населбата е опфатен со канализациска мрежа која е приклучена на колекторскиот систем. Жителите очекуваат „Проаква“ најитно да реагира и да го санира проблемот, пред да дојде до покачување на дневните температури кои можат дополнително да ја ископлицираат состојбата затоа што фекалните води на места буквално ги преплавуваат дворовите од куќите.
