Министерството за транспорт и врски се уште нема назначено нов капетан на Капетанијата на пристаништата во Охрид, откако пред повеќе од еден месец со „Новиот бран“ од функцијата беше разрешен капетанот Љупчо Настоски. Локалната самоуправа го обвинува министерството дека ја одолговлекува постапката, што им создава проблеми на граѓаните кои имаат пловни објекти затоа што не можат да ги завршат потребните административни процедури.
– Се надевам дека ќе пронајдат некој среќник да го постават за капетан. Се мислат веќе месец дена кој да биде и сега граѓаните имаат проблем со пловните објекти кои не можат да ги регистрираат затоа што нема капетан, едниот го сменија, а другиот никако да го постават, изјави градоначалникот Александар Петрески.
Од Министерството за транспорт и врски велат дека не се одолговлекува процесот и веќе е извршено интервјуирање на кандидатите кои се јавиле на јавниот огласа, а по евалуацијата која следи, ќе биде извршен избор на нов капетан.
-Без оглед на тоа, Капетанијата на пристаништа во Охрид функционира со полн капацитет и ги извршува сите активности согласно Законот за внатрешна пловидба и во соработка со Езерската полиција врши редовни контроли во однос на почитувањето на законските прописи, информираат од Транспорт и врски
Според официјалните информации, дозвола за пловидба на Охридското Езеро до моментов имаат 436 чамци и три патнички бродови, кои и оваа година нема да пловат кон соседна Албанија, бидејќи и по 10 години од отпочнувањето се уште не е реализрана иницијативата за воспоставување меѓународна бродска линија Охрид – Поградец.
– Голем број од туристите што доаѓаат било да се од земјава или надвор од Македонија бараат една таква линија за да можат да ги гледаат убавините на Охридското Езеро, а и да ги посетат градовите, вели градоначалникот на Охрид.
Од транспорт и врски велат дека од македонска страна се извршени сите законски и технички подготовки за воспоставување на меѓународната бродска линија Охрид – Поградец, како и дека се остварени контакти со ресорното министерство од Република Албанија, но не постои комерцијален интерес од албанска страна за реализација на оваа иницијатива.
