Можеме да го освоиме второто место во групата, дури и ако загубиме во Амстердам, изјави Среќко Катанец, македонскиот селектор, во пресрет на мечот в среда (20.45 часот) на гости со Холандија, во квалификациите за СП 2010.– Ако освоиме барем бод на ова тешко гостување, позициите на македонската репрезентација ќе бидат многу подобри во продолжението од квалификациите. Холандија има светски ѕвезди, но исто беше и во Скопје кога бевме рамноправни и многу блиску до еден бод. Ни требаат бодови, но не смееме да форсираме премногу. Ќе играме во наш стил, за да создадеме што повеќе шанси за гол, бидејќи верувам дека овие момчиња го можат тоа. Ако искористиме барем една, можеме да се надеваме на поволни вести од Амстердам – смета Катанец.
