Министерството за здравство информира дека над 80 проценти од јавните здравствени установи постапиле согласно доставеното укажување за соодветно прилагодување на шалтерите во ЈЗУ.
За здравствените установи кои во следниот месец нема да постапат согласно укажувањето на министерството за адаптација на шалтерите, предвидена е парична казна за директорите – 10 посто од плата за два месеци. Ако и во наредниот месец не постапат согласно укажувањето ќе бидат казнети 4 месеци по 10 посто од плата, а доколку и во следните три месеци не завршат со потребното адаптирање ќе бидат санкционирани – 6 месеци по 15 посто од плата.
– Целта е шалтерите, кои даваат услуги за пациентите да бидат прилагодени на начин што ќе бидат отворени, транспарентни и со висина прилагодена на висината на пациентите за да можат полесно и потранспарентно да комуницираат со давателите на шалтерските услуги, потенцираат од надлежното министерство.
Предвидено е горниот дел од шалтерите да биде изработен од проѕирен материјал (стакло, пластика), а крајната цел е да се зачува и унапреди дигнитетот и достоинството на пациентите и на шалтерските работници и подобрување на меѓусебната комуникација.
