Полицијата пронашла рибарски мрежи долги околу 100 метри и разновиден риболовен алат. За случајот е известен надлежниот инспектор за рибарство.

Рибарски мрежи со улов од 239 риби охридска белвица и други видови, со вкупна тежина од 24 килограми и 550 грама, пронашла полицијата при контролна патрола во Охридското Езеро, во близина на Пештани.

Контролата била извршена на 15 ноември од полициски службеници од Полициската станица за граничен надзор „Охридско Езеро“, при Регионалниот центар „Запад“. Покрај мрежите, долги околу 100 метри, биле пронајдени и повеќе парчиња разновиден риболовен алат.

По насоки на јавен обвинител, мрежите, уловот и риболовниот алат се одземени за натамошна постапка. За случајот е известен надлежниот инспектор за рибарство од Државниот инспекторат за земјоделие.

Г.М.