Ентузијазмот но и обврската е пристуна и во охридскиот табор, сите ја знаат тежината и значењето на мечот со 11 Октомври. Со победа над директниот конкурент за врвот на табелата на шест рунди пред крајот “рибарите“ со една ќе бидат во Првата Лига.
– Победуваме. Ова се тие натпревари за кои еден играч, за кои еден тренер живее. Наша цел во текот на целата сезона беше да играме офанзивен и атрактивен фудбал кој ќе ги привлече гледачите да ги следат нашите на натпревари. Мислам дека успеавме во тоа и мечот со 11 – ти ќе биде вистинско уживање – вели стратегот на “белите“ Зоран Ѓорески – Џајо.
Охрид го има најдобриот напад во лигата со 37 постигнати гола, го имаат најдобриот стрелец во лигата , Клечкароски 14 гола, но пред себе ја имаат најдобрата одбрана во лигата, онаа на 11 Октмври која досега прими само 9 гола.
– Стрпливо ќе ја градиме нашата игра, нема безглаво да јуришаме кон противничкиот гол, и убеден сум дека ќе ја затресеме противничката мрежа и ние ќе бидеме тимот кој на крајот ќе се радува – истакна капитенот на тимот Митрески Љупчо.
На домашен терен Охрид нема испуштено бод, има биланс од девет победи во исто толку натпревари со гол разлика 24-3, “белите“ се наоѓат во низа од две победи без примен гол.
Свое шоу на супердерби најави и навивачката група “рибари“ која во изминатите 19 рунди беше 12 фудбалер на Охрид. – Силно ја посакуваме победата и обезбедување пласман во Првата лига. Нема да ги штедиме нашите грла во подршката за фудбалерите за да се стигне до победата која в година ќе ни ги донесе, Вардар, Работнички, Металург, Пелистер, Шкендија во Охрид – коментираат навивачите.
Натпреварот ќе го води интернационалниот судија Димитар Мечкаровски од Скопје. Стартот на мечот е закажан во сабота од 16 часот.
