Ќе победеше ли Данска доколку Лазаров асистираше?

И по преспиена ноќ и еден ден не стивнуваат реакциите за несреќниот пораз на македонската ракометна репрезентациоја од Данска на ЕП во Србија. Македонија прокоцка водство од 6 гола разлика во првиот дел, за во второто полувреме да успее да се врати од -3 и го имаше последниот напад за победа. Одговорноста ја презеде капитенот Кире Лазаров но неговиот удар го одбрани данскиот голман по што  уследи молњевита контра и гол за пораз буквално во последната секунда од мечот. Но дали можеше да биде поинаку доколку Лазаров (13 гола), кој беше удвоен, наместо да шутира, го проиграше Стоилов на линијата од 6 метри кој беше во гол позиција со чувар кој веќе газеше во забранетата зона. Евентуално промашување ќе беше пенал. Втора можност беше додавање за искусниот Алушески кој има отворен пат пред себе затоа што неговиот чувар тргнува во контра. Доколку имаше асистенција, а немаше реализација, ќе немаше ниту време Данска да направи чудо кое и донесе неверојатна и значајна победа.

Веројатно нашите момци извлекоа уште една горка поука од поразот во белградска Арена во која доминираа македонските навивачи. Време за тагување нема, затоа што денес не чека ново искушение против репрезентацијата на Полска (16.20).