Министерството за образование и наука во текот на вчерашниот ден распиша јавен повик за избор на „Најбезбедно и најчисто училиште”. На повикот може да аплицираат сите основни и средни училишта на територијата на Република Македонија.
Училиштата кои ќе аплицираат за изборот треба да се дел од „Интеграција на еколошката едукација во македонскиот образовен систем“ (ЕКО училиште) како и да имаат учествувано на најмалку три проекти или работилници кои опфаќаат некоја од следниве области: здрава и еколошка средина, безбедост, ненасилство, разрешување на конфликти и слични содржини.
Училиштата кои ќе аплицираат треба да ги исполнуваат следните критериуми:
1. Одржување на зградата и здрава внатрешна средина;
2. Уреден и еколошки двор;
3. Безбедни/сигурни услови за престој и работа во училиштето.
При аплицирањето, секое училиште треба да ја пополни апликацијата кој е поставена на Веб страницата на Министeрството за образование и наука, најдоцна до 10-ти мај 2014 година. За избор на „Најбезбедно и најчисто училиште”, ќе биде формирана посебна комисија во министерството. По доставените апликации комисијата ќе изврши увид во самите училишта, со цел да се потврдат доставените докази во прилог на апликацијата.
OhridNews
