Ј.П.”Охридски Комуналец” денеска ќе започне акција за расчистување на дивите депонии на локации и места чие одржување не е во ингеренции во јавното претпријатие.
-Акцијата се спроведува на иницијатива на градоначалникот на општина Охрид, Александар Петрески, и има за цел да се расчистат депониите кои создаваат негативен впечаток за Охрид како туристички центар, иако Локалната самоуправа многу вложува во туризмот и привлекување на странски туристи, информираат од јавното претпријатие.
Акцијата денеска ќе започне со чистење на појасот околу магистралниот пат Охрид-Скопје, на потегот од сообраќајната клучка при влезот во Охрид до охридскиот аеродором “Св.Апостол Павле”. Ќе се расчистуваат мини-депонии од градежен шут и расфрланиот отпад, а исто така ќе се искоси тревата околу магистралниот пат, за што ќе бидат ангажирани 20 вработени и специјална механизација.
Во сабота ќе биде спроведена акција за чистење на крајбрежниот појас во населба Даљан, во близина на х.Магнус.
-Иако со голем дел од овој простор стопанисува правен субјект, никој не се грижи за одржување на хигиената, па затоа во сабота ќе се расчистува овој простор, објаснуваат од „Комуналец“.
Од 30. јули Ј.П.”Охридски Комуналец” ќе ангажира свои вработени за одржување на јавната хигиена на појасот околу магистралниот пат Скопје-Св.Наум, на потегот од аеродором “Св.Апостол Павле” до Св.Наум.
-Се надеваме дека со ваквите акции ќе се разбуди еколошката свест кај поединци и дека диви депонии нема да ги пречекуваат добронамерниците во најголемиот македонски туристички центар, додаваат од ЈП „Охридски Комуналец“.
OhridNews
