На 23 јуни започнува петто јубилејно алтернативно културно-забавно лето на „Културолошка Иницијатива 5 до 12“ со еден од најголемите настани во претходните години во Охрид, а тоа е отвореното летно кино со автомобили, Summer Drive-in Cinema.
Во рамки на тридневното кино ќе бидат прикажани филмовите „Снежана на крајот умира“ во петок, „Парада“ во сабота и „Некрстени денови“ во недела, информираат од „Културолошка Иницијатива 5 до 12“.
Издаден минатата година, „Снежана на крајот умира“ е филм на Кристијан Ристески кој го опишува филмот како социјална драма во амбалажа на комедија и апсурд низ три приказни за три групи луѓе, една мува, едно прасе, една веце шолја и еден град, чии патишта се допираат и влијаат еден на друг.
„Парада“ е комедија-драма на Срѓан Драгојевиќ, во која прашањата за ЛГБТ заедницата во Србија се обработени низ една приказна каде активисти за хомосексуални права организираат парада на гордоста, незаштитени од полицијата, па бараат заштита од група криминалци.
Филмот „Некрстени денови“ на Иво Трајков, преку брилијантната црно-бела фотографија суптилно и нетенденциозно доловува атмосфера на историска драма која претставува огледало на хипокризијата на моралот, религијата и патријархалната традиција во општеството – подеднакво релевантна денес, како и во периодот непосредно пред Втората светска војна.
Влезот ќе биде отворен од 19:30ч, а по почетокот на проекцијата нема да биде дозволено влегување. Билетите по цена од 500 денари по автомобил ќе може да се купат на влез, додаваатод „Културолошка Иницијатива 5 до 12“.
Проекциите ќе бидат на просторот кај поранешната Касарна во Охрид со почеток во 21 часот.
OhridNews
