Кој ги штити загадувачите на Охридското Езеро?

Изминатите неколку години на Охридското Езеро се случија повеќе сериозни еколошки инциденти, но тоа очигледно не ги загрижува надлежните институции на локално и централно ниво, кои, засега, најгласни се кога се проласуваат  за ненадлежни за одредена проблематика. Така беше и при секој еколошки инцидент со кој се уништува најголемиот басен со питка вода во Југоисточна Европа. Пред неколку години боја од пловните објекти кои сеуште се пескарат кај каналот Студенчишта заврши во езерото. Потоа следуваа неколку излевања на гориво кај пристаништето, но ниту во првиот случај, а и потоа, не беше откриен загадувачот. Случаите и покрај “вознемиреноста“ која ја манифестираа одговорните завршија со поднесување кривична пријава против непознат сторител, иако во текот на истрагата, како впрочем и при неодамнешниот еколошки инцидент со излевањето на нафта на пристаништето, се тврдеше дека постојат сериозни индиции за можниот сторител. Со покажаната ефикасност на надлежните инспекции загадувачите можат да бидат спокојни, дотолку повеќе што молчат и невладините организации и друштвата за заштита на животната средина, кои освен по некоја реакција во медиумите не ги видовме – слушнавме да излезат со некаков став. Среќа е, барем така говорат податоците на Регионалниот завод за здравствена заштита, што неодамнешното излевање на гориво во езерото не причинило сериозни последици.