Поради климатските промени и топлото време, неопходно е да се изврши уште едно, септемвриско прскање против комарци на ниво на цела држава, заклучи Комисијата за заштита на населението од заразни болести при Министерството за здравство на вонредната средба за превентивни мерки за заштита од западнонилска треска, јавува „МИА“.
Заклучено е да се изврши и дополнителна дезинсекција (ларвицидна и теристичка), посебно на критични точки и региони, како застоени езера и канали, мочуришта…Министерството за здравство ќе ја помогне оваа мерка со сопствени средства. За нејзино спроведување е задолжен Институтот за јавно здравје во соработка со центрите за јавно здравје, кои треба да направат детален план за околината на Скопје и покритични точки во Македонија.
На средбата, како што информира Министерството за здравство, било заклучено дека Институтот за јавно здравје располага со доволен број тестови за дијагностика, а на Клиниката за инфективни болести ги има потребните лекови за третман на заболените од енцефеалит и менингоенцефалит.
Комисијата заклучи и дека и понатаму граѓаните треба да ги почитуваат превентивните мерки за заштита од комарци – употреба на лични заштитни средства за мачкање, поставување соодветни апарати за заштита од комарци, поставување мрежи на врати и прозорци, исушување на застоени води во дворови, олуци, бари…
