Света Софија беше исполнета со домашна и странска публика, но најмногубројни беа македонските кларинетисти, професори и студенти, за кои присуството на овој концерт, како што и самите изјавија, е голема чест, празник за душата, но и голема лекција.
Чарлс Најдих ја плени публиката со неговата мајсторска изведба, убавината и племенитоста на неговиот тон, како и беспрекорното и бравурозно техничко владеење на инструментот. Посебно инспиративно беше кога маестрото изведе своја композиција посветена на цунамито во Јапонија. Публиката го награди со силни и долги аплаузи, а маестрото, и покрај долгиот и захтевен програм, подари и бис со прекрасна изведба на една Романса од Шуман.
Уметникот го искажа своето огромно задоволство од публиката, а особено од преубавиот и акустичен простор на Света Софија, кој, како што самиот изјави, му бил додатна инспирација за свирење. Маестро Најдих не ја криеше својата желба повторно да ја посети Македонија и фестивалот, но со подолг престој при што ќе има можност да одржи и семинар за, како тој што вели, талентираните млади македонски кларинетисти.
