– Единствена забава на вода која им се нуди на гостите се скутерите. Несреќи се случувале и со глисерите, па нивната пловидба не се ограничува. Оние кои нема да ги почитуваат законските одредби , меѓу кои и почитувањето на пропишаната оддалеченост од брегот, нека се казнуваат, но не и да се ограничува возењето, вели Дејан Маслов, концесионер на плажа Канео.
Од охридската Капетанија на пристаништа се децидени- одлуката за ограничување на пловидба на скутерите која стартува на 1 јули останува.
– Барањето на концесионерите не го разбирам. Анализите покажуваат дека 90% од луѓето се против возење на скутери и се за ограничувањето. Не ми е јасно како концесионерите се за да се возат скутерите, ако тие се оние кои ги бркаат нивните гости од плажите и претставуваат опасност за капачите, вели раководителот на охридската Капетанија на пристаништа, Горан Устијаноски.
Toj нагласува дека деновиве се забележани неколку инциденти предизвикани од страна на скутерии на плажа во Лагадин и во струшкиот дел од езерото, но дека се вршат редовни контроли со цел проблемите да бидат отстранети.
Ограничувањето на пловидбата за скутерите почнува од 1 јули и ќе трае до 31 август, во времетраење од 11 до 19 часот секој ден.