Единицата за Компјутерски криминал при Центарот за сузбивање организиран и сериозен криминал при МВР на РМ по претходно спроведена меѓународна истрага во соработка со министерствата на Р.Србија и Р.Бугарија, а во координација на СЕЛЕК центарот, реализираше случај во кој е разбиена меѓународна криминална група составена од македонските државјани Б.К.(29), Р.К.(27) двајцата од Скопје, Н.Т.(39), Д.П.(22) и Д.Ј.(22), тројцата од Прилеп и српските државјани А.Г.(31) и А.Р.(31), кои во периодот од ноември 2011 до април 2012 година неовластено прибавиле опрема за изработка на лажни платежни картички, како и прибавиле банкарски податоци од вистински платежни картички и податоци за носители на тие платежни картички, со помош на кои подоцна изработувале лажни платежни картички кои ги употребиле на банкомати во Р.Македонија. Досега е утврдено дека во наведениот временскиот период членовите на криминалната група во 20 наврати, на банкомати на три домашни банки поставиле уреди за снимање на податоци од платежни картици. Во овие случаи членовите на криминалната група успеале да украдат (нелегално да прибават) податоци од вкупно 1.111 платежни картички во сопственост на македонски државјани, со кои извршиле вкупно 238 успешни нелегални трансакции со што се стекнале со противправна имотна корист во износ од 4.135.177,00 денари.
Поради основано сомнение дека криминалната група составена од македонски, српски и бугарски државјани се занимава со вршење на кривични дела поврзани со изработка и употреба на лажни платежни картици во јануари била покрената меѓународна истрага во која биле вклучени полициските служби на Р.Македонија и Р.Србија и Р.Бугарија.
Од преземените мерки и активности и со примена на посебни истражни мерки е утврдено дека членовите на криминалната група во повеќе градови во Р.Македонија (Скопје, Тетово, Прилеп, Битола, Ресен, Штип и Кавадарци) поставува уреди за снимање на податоци од платежни картички. Нелегално обезбедените податоци од платежни картички Б.К. и Р.К. ги носеле во Р.Бугарија каде што непознат бугарски државјанин ги изработувал лажните платежни картички. За услугата им наплатувал по 50 % од извадената сума на пари или задржувал половина од нелегално обезбедените податоци. Со вака изработените лажни платежни картички членовите на криминалната група извршиле нелегални трансакции на банкомати на осум домашни банки во Скопје, Тетово, Прилеп и Велес. Согласно со доставените пријави од банките за злоупотреба на платежни картички на нивни клиенти во странство е утврдено дека дел од скимираните податоци од платежни картички се употребени и на територијата на Тајланд и Уганда. Исто така во периодот додека се преземани мерки и активности од страна на Единицата за компјутерски криминал во содејство со банките во Р.Македонија одземени се два уреди за снимање на податоци од платежни картички кои членовите на криминалната група ги поставиле на банкомати во Скопје и Кавадарци.
На 17.04.2012 година при обид да постават уред за снимање на податоци од платежни картички на банкомат во Прилеп од страна на полициски службеници од ПС Прилеп во координација со Единицата за компјутерски криминал приведени се Н.Т., Д.П. и Д.Ј.. Од извршениот личен претрес, како и при претрес во возилото на Н.Т. пронајдени се два уреди за снимање на податоци од платежни картички.
Од страна на Истражен судија на шест од пријавените им е одредена мерка притвор во траење од 30 дена (на српските државјани во отсуство), а на Н.Т. му е одредена мерка куќен притвор во траење од 30 дена. Б.К., Н.Т. и Д.П. се познати од порано како сторители на кривични дела од областа на злоупотреба на фалсификувани картички.
