Здружението „Зелена лупа“ поднесе кривични пријави против десет судии, меѓу кои и за претседателот на Врховен суд – Јово Вангеловски, jaвува „Макфакс“. Сите пријави се однесуваат на случајот на СЈО, во кои обвинетите Горан Грујовски и Никола Бошковски сега се во бегство. Кривичните пријави се поднесени против судиите Ленка Давитковска, Татјана Михајлова и Дијана Груевска од Основниот суд Скопје 1, Лилјана Шопова, Сафет Кадриу и Цветанка Периќ од Апелацискиот суд Скопје, како и против судиите Јово Вангеловски, Фаик Арслани, Ристо Катавеноски и Џемаил Саити од Врховниот суд. Сите пријави се за злоупотреба на службената положба, со намера други да прибават корист.
– Основниот суд кој без проблем секојдневно штанца притвори со некакви клише-образложенија одеднаш почнува да го крши законот и во овој случај на СЈО не одредува притвор. Апелацискиот суд, пак, ја преиначува одлуката и иако определи притвор, незаконски им дозволи на обвинетите право на жалба до Врховен суд и тоа жалба со одложено дејство. Тоа не е никаде предвидено во Кривичниот законик. Но иронијата не застанува тука, Врховниот суд постапува, додека обвинетите се на слобода. Тој што ја има способноста, ја има и одговорноста. Ова мора да запре, затоа поднесовме кривични пријави – изјави адвокатот Благој Јовановски од „Зелена лупа.“
Од здружението одговорност од судиите ќе бараат и преку Советот за утврдување факти.
OhridNews
извор: „Макфакс“
