Секторот за внатрешни работи Охрид, против А.В.(32) од Охрид поднесе кривична пријава поради постоење основи на сомнение за сторено казнено дело „Напад врз службено лице при вршење работи на безбедноста“.
Како што соопшти полицијата, пријавениот, на 18-ти овој месец, во болничка соба во болницата „Св.Еразмо“ упатил навредливи и заканителни зборови кон неколку полициски службеници по што се обидел да избега од собата кон ходникот. Во тој обид за бегство и скокање преку оградата од скалите тој бил спречен од тројца полициски службеници и бил доведен во друга болничка соба. Тука пријавениот превртел дел од инвентарот по што со рака удрил еден инспектор во пределот на градите кинејќи му притоа дел од облеката. Пријавениот во еден момент побарал вода по што му била дадена чаша со вода но тој ја скршил и замавнал кон полициските службеници. Со нивна навремена реакција, бил спречен обидот пријавениот да повреди полицаец.
Настанот се случил непосредно откако во болничката соба каде лежел пријавениот, бил пронајден еден килограм опојна дрога Марихуана по што му вило соопштено дека е лишен од слобода.
Инаку, лицето е познато на службата и против него досега биле поднесувани кривични пријави за сторени повеќе казнени дела за што бил и затворски осудуван, информираат од СВР Охрид.
