Секторот за внатрешни работи Охрид, поднесе кривична пријава против 45- годишен охриѓанец поради постоење основи на сомнение за сторено казнено дело „Напад врз службено лице при вршење работи на безбедноста“.
На 3-ти овој месец, пријавениот со своето патничко моторно возило марка „БМВ“ го прегазил стапалото од десната нога на полициски службеник кој вршел физичка регулација на сообраќајот.
Настанот се случил во 13 часот на влезот од манастирскиот комплекс „Св.Наум“ во момент кога униформираниот полициски службеник на охриѓанецот му ја покажал насоката каде треба да го паркира и остави моторното возило. Незадоволен од тоа и игнорирајќи ја наредбата, тој со своето возило му пристапил и застанал непосредно до полицискиот службеник, барајќи од него да му биде дозволен влез во манастирскиот комплекс. Откако и вербално му било кажано дека треба да се паркира на земјениот паркинг простор, пријавениот го придвижил возилото наназад по што од истото излегле члено- вите на неговото семејство. Потоа лицето повторно почнало да се движи кон влезот на манастирскиот комплекс, при што полицискиот службеник уште еднаш со рака му ја покажал насоката кон паркинг просторот. Во истиот момент пријавениот силно го стартовал возилото „БМВ“ и го насочил директно кон униформираниот полициски службеник. Притоа со предното десно тркало поминал врз неговото десно стапало нанесувајќи му телесни повреди.
По настанот, полицискиот службеник е пренесен во болницата за ортопедија и трауматологија „Св.Еразмо“ во Охрид каде му е дадена неопходната медицинска нега.
