КУД „Гердан“ – Охрид ќе настапи на Интернационален фестивал во Полска

КУД „Гердан“ – Охрид од 4-ти до 13-ти септември ќе учествува на интернационалниот фолклорен фестивал во Зелена Гора – Полска. Патувањето на 35-те фолклористи кои партиципираат во покривање на трошоците, финансиски го поддржа локалната самоуправа.

На фестивалот на кој ќе учествуваат 20 ансамбли од целиот свет, охридските играорци  ќе имаат повеќе настапи, што според раководителот Методија Баракоски се должи на тоа што македонскиот  фолклор е атрактивен со колоритот и игрите и му се дава поголемо значење. Сепак, тој нагласи дека аматеризмот барем во фолклорната бранша кај нас е во опаѓање и потребно е да се преземат одредени мерки да се подигне квалитетот на друштвата.

-Во Охрид постојат повеќе фолклорни ансамбли. Желба ми е да се направи едно квалитетно друштво по примерот на „Линџо“ од Дубровник, кое има 600 членови, истакна Баракоски.

Најстарото културно уметничко друштво во Охрид, „Гердан“, постои од 1968 година и до сега има учествувано на 66 меѓународни фестивали ширум Европа.