– Со учеството на сите политички партии, ќе се оневозможи политичко етикетирање на младите и нивна злоупотреба за политички маркетинг. На овој начин ќе се зачувува достоинството на младите таленти и нивните семејства. Покрај другото предлагаме при проекција на идниот Буџет на општина Охрид, да се одвојат повеќе средства за талентираните деца, рече на денешната прес- конференција претседателот на форумот на жени на ОО на ЛДП, проф. Лидија Јевтовиќ.
Од општинската ЛДП, јавно им се заблагодарија на сите млади таленти кои се закитија со награди и признанија и истовремено извршија промоција на нашиот град.
– Оваа година како никогаш до сега, сериозна бројка на млади луѓе од Охрид се стекнаа со признанија и награди не само на државно, туку и на светско ниво. Покажавме дека во Охрид, има млади научници, одлични стрелачи, кајакари, велосипедисти, талентирани пејачи и уметници. ЛДП сака да ја поздрави и големата ангажираност на младите во невладините организации и нивната волонтерска работа, додаде Јевтовиќ.
Таа потенцира дека жално е што повеќето политички партии во Охрид, секодневно ја бомбардираат јавноста со непристојна реторика, и преголема опседнатост со претстојните локални избори, истовремено забравајќи на проблемите и успесите на младите луѓе во Охрид.
