Лекарската фела во Охрид очекува надлежните институции сериозно да му пристапат на случајот со лажните лекари кои со вешти измами неодамна успеале да оштетат повеќе лица со здравствени проблеми.
Од општата болница од Охрид се сомневаат дека изманиците располагаат со доверливи информации за пациенти кои биле лекувани или оперирани во некоја од скопските клиники или специјализирани болници низ земјата.
– Овие лица најверојатно располагаат со списоци на пациенти од овие здравствени установи, одат по домовите, се претставуваат со лажни легитимации и наплаќаат од 3 до 6000 денари. Во случајот се инволвира и Општата болница Охрид дека наводно ќе дојделе професори после 15 септември и дека со посебна листа пациентите ќе биле викани на преглед за да не се изложуваат на дополнителни трошоци за патување во Скопје, изјави д-р Сашо Василески од охридската општа болница.
Тој упати апел до пациентите да бидат внимателни и да не подлегнуваат на ваквите измами. „Со случајот се запознаени надлежните институции и се надевам дека ќе бидат преземени мерки и дека овие луѓе ќе бидат фатени“, додава д-р Василески.
