Денес истекува рокот кој од страна на локалната самоуправа им бил даден на првите луѓе на охридските образовни институции за поднесување на нивните оставки од функцијата директор.
Од локалната не откриваат колку од директорите до денес поднеле оставка, освен дека некои од нив тоа го направиле во текот на неделата, а не се знае колку уште оставки ќе пристигнат по пошта.
Дел од директорите за OhridNews само со коментар дека е неправедно работењето на сите образовни институции да се оценува еднакво и дека јавноста е сведок кој колку сработил.
– Зад нас стојат бројни остварени позитивни резултати и освоени награди на државни и меѓународни натпревари .Но, ако се бара од нас да поднесеме оставка, а при тоа не ни се дава избор, тоа и ќе го направиме, велат тие.
Оставките следат по јавно искажаниот став на градоначалникот Никола Бакрачески и локалната самоуправа дека состојбата во образовните институции во општина Охрид е лоша, поставена на несоодветни основи, со голем број нерасчистени состојби и финансиски дубиози кои го опртеретуваат функционирањето на образовниот систем во општината.
– Морален чин на секој одговорен човек во општеството, е при лоши резултати, самиот да има доблест и да поднесе оставка на својата функција. Тоа е чин кој не треба да биде изнудуван, туку одговорно и етички секој треба да го применува кога резултатите се под очекувањата на граѓаните-изјави градоначалникот Бакрачески.
