На градскиот плоштад во Охрид и оваа година ќе се организира скромен, но весел дочек на Новата година, најавува градоначалникот Александар Петрески кој потенцира дека најголемиот број пеачи кои ќе бидат ангажирани да ги забавуваат присутните на плоштадот ќе бидат охридски пеачи и групи.

– Иако е предизборна година и многу градоначалници не штедат пари за носење ѕвезди на кои ќе им платат и по 40 или 50.000 евра за настап од половина или еден час, кај мене тоа не поминува. Ние повторно, како минатите години, ќе организираме скромен и весел дочек, со што повеќе охридски ѕзвезди, бидејќи  за мене најголеми ѕвезди се оние од Охрид, вели градоначалникот Петрески.

При дочекот на 2012 на градскиот плоштад присуствуваа десеттина илјади охриѓани и гости. Нив ги забавуваа Ѓоко Танески, Влатко Илиевски и други музички уметници.

Инаку, украсувањето на градот со новогодишни украси веќе започна. Од локалната самоуправа објаснуваат дека се користат украси од минатите години, а набавени се и нови. Целта е во новогодишно руво да блеснат и периферните делови од градот, а не само  централното градско подрачје.

Т.К.