Стилот на играње специфичен фудбал „сите во одбрана“ односно катанаџо, најдобро го прикажа италијанскиот Милан кој и покрај лошиот резултат на домашен терен пред една недела (2:2), го шокира Баерн со два брзи гола, кои до крајот на мечот беа бранети со одбрана од врвна класа. Иако Германците имаа иницијатива и на почетокот од мечот во Минхен направија некои шанси, искуството на Италијанците се покажа за само 4 минути 27-ма и 31-ва. Два одлични голови за 0:2 на Сидорф и џокерот Инзаги (од офсајд, судијата не виде). Сепак тоа не го намалува успехот на Милан кој во полуфиналето ќе игра со импресивниот Манчестер.


Крауч – играч на мечот

Ливерпул својата работа ја заврши на теренот од ПСВ со победата од 0:3, па на Енфилд навивачите пееја победнички песни уште од првите минути. Бенитез ги одмораше домашните херои Карагер и Џерард, а единствена црна дамка беше повредата на Белами (заменет од Фаулер). Решавачки момент – 67-ма минута, одличен удар на Питер Крауч за вкупна победа од 4:0 на европските прваци од 2005. Во англиското полуфинале (реприза од 2005 г.) Ливерпул ќе игра со Челзи.  

С. Костоски