Скопскиот алтернативен рок бенд Визија ќе настапи на овогодинешниот музички фестивал „EXIT“ во Нови Сад, еден од најголемите музички фестивали во светот. На регионалниот конкурс Play@EXIT се пријавија повеќе од 450 бендови, а одбрани се најдобрите 33 изведувачи кои што ќе имаат можност да ја претстават својата музика од 5-ти до 9-ти јули на Петроварадинската тврдина. Визија е единствениот бенд од Македонија кој ќе ја има честа да настапи на овој престижен фестивал, каде што ќе настапат големи светски имиња како што се The Killers, Years & Years, Hardwell, Liam Gallagher, Jason Derulo, The Jesus And Mary Chain, Paul Kalkbrenner, Robin Schulz, Rag ‘N’ Bone Man и други.

Покрај Визија, преку Play@EXIT конкурсот, учество обезбедија и бендовите: Novembar, Remedy, Piknik, Helem Nejse, Maika, Cao Portoroz, Sputnik, The Fedz, TheGift, 3 Kapljice, The Churlians, Stranger in my Town, Penetratori I Norveska suma, Ljubicice, Bvana iz Lagune I neznani ludaci, Plavo, Rosetta Stoned, Regulator, Jazzy Bit, Empathy Soul Project, Uzemljenje, Irvas, Slow motion suicide, Cincila, Grashoper, Plastic Sunday, 3 macke 100 godina, Floridus, Become as one, Hurleur и Gospodjo bate.

Најголем дел од овие групи ќе настапат на Future shock стејџот, а Визија е еден од двата бенда кои што добија можност да настапат на Fusion стејџот, кој важи за еден од најголемите на фестивалот.
Бендот „Визија“ е составен од членовите Марко Џамбазоски, Марко Гапо, Лилјана Јанкова и Синиша Ѓорѓевиќ. Неодамна го издадоа својот прв албум „Гласно!“, а до сега имаат настапено на дел од најголемите балкански фестивали како што се Заечарската гитаријада (Србија), Таксират (Македонија), Јелен демофест (БиХ), Лејк фест (Црна Гора), Миксер (Србија), Земјотрес (Македонија), Rock ‘n’ pop the borders (Бугарија) итн.

Покрај овие настапи, бендот добива одлични критики од американската радио станица „WMBR” и британските музички веб сајтови „The devil has the best tuna” и „Emerging Indie Bands” кој на неговата листа на најдобри 90 нови бендови од светот за 2014 година, ја поставува Визија на високото седмо место.

OhridNews