Од утре до 12 септември во Охрид во Конгресниот центар на Универзитетот „Св. Кирил и Методиј“, ќе се одржи 12. македонско-северноамериканска конференција за македонистика.
Со ова нејзино издание се продолжува повеќе од тридецениската традиција на соработка меѓу научниците од северноамериканската и македонската академска средина, започната со одржувањето на првата конференција одржана во 1991 г. на Универзитетот Мичиген во Ен Арбор, САД, велат од Филолошкиот факултет.
Конференцијата се одржува на секои три години, наизменично во Македонија и во Северна Америка, со цел да се продолжи и да се продлабочи соработката меѓу научниците и истражувачите од двете страни. Македонистичките проучувања опфаќаат различни дисциплини, па така на овие конференции се изложуваат теми од областа на македонистиката во поширока смисла: проучувања на македонскиот јазик и на македонската книжевност, но и на историјата, археологијата, етнологијата, антропологијата, социологијата, културата, уметноста, фолклорот и др., посочуваат.
На годинешната Mакедонско-северноамериканска конференција, потенцираат, ќе учествуваат еминентни странски македонисти, слависти и балканисти, како Виктор Фридман, Кристина Крамер, Кит Браун, Грејс Филдер и др., кои со своите колеги од Македонија ќе разменат идеи, резултати и искуства, претставувајќи ги своите истражувања поврзани со широк спектар теми од областа на македонистиката.
Конференцијата традиционално е под покровителство на Универзитетот „Св. Кирил и Методиј“ и е организирана во соработка со Филолошкиот факултет „Блаже Конески“ во Скопје.
OhridNews
