На меѓуграничната зона меѓу Македонија и Србија, надвор од Транзитниот центар Табановце состојбата со децата бегалци е катастрофалнa, реагираат од Првата детска амбасада во светот „МЕЃАШИ“.
-Нехумани и нечовечки се условите во кои децата престојуваат, во импровизирани шатори на ниски температури. Децата бегалци се гушат во смрдеа и кал, се дават во нечистотија. Делегации и телевизии снимаат и толку… Понижување за нив, а срам за човештвото се сликите кои нашите активисти ги видоа и забележаа на терен. Ѓубре на сите страни, но и лица кои го собираа сметот. Ваков третман со децата бегалци не само што не е хуман и човечен туку е деградирачки за едно детско битие кое бара спас и надеж од голготата на војната од која избегало. И наместо отворени врати и раце сите во Европа ги пречекуваат со бариери, бодликави жици и третман недостоен за било кое човечко суштество, се вели во реакцијата на „МЕЃАШИ“.
Во неа се потецира дека ваков пристап кон децата бегалци насекаде во светот е вистинско безумие, хаос и типичен пример на дволичност кон страдањата на децата бегалци погодени од војната.
-Да се штитат државите од децата бегалци со импровизирани шатори, заглавени во калта, со влага која станува секојдневие е понижување на детското достоинство. Паднаа во вода Конвенцијата за правата на детето и другите меѓународни документи за заштита на децата на кои Европа толку се повикува! Детската амбасада „МЕЃАШИ“ ги повикува сите организации кои се борат за заштита на правата на децата да одговорат на предизвикот, на овој голем предизвик и искушенија во подигање на гласот за нехуманиот однос и третман кон децата бегалци заглавени на меѓуграничните простори на секаде каде децата бегалци транзитираат. Мора заеднички да го кренеме гласот и да нагласиме дека политиките и начинот на кој европските земји се справуваат со бегалската криза во која децата бегалци страдаат се одговорни за секој детски живот и судбина, велат од „МЕЃАШИ“
OhridNews
