Претставници на ДУИ ќе го убедуваат нивниот сопартиец, актуелниот градоначалник на Струга, Рамиз Мерко, да не се кандидира за уште еден мандат на локалните избори во 2013 година, jавува „Макфакс“ повикувајќи се на високи партиски извори.
Според нив, Мерко ќе и помогне на партијата доколку своите гласови ги префрли на сметка на партискиот кандидат, наместо сам да се кандидира.
Мерко претходно велеше дека ќе се кандидира за градоначалник на Струга, уште еднаш, макар тоа да не биде под закрила на партијата.
Исто така, за Кичево ќе се бара кандидат за кој би гласале и Македонците.
Според истиот извор, во анкетите кои ги спроведува ДУИ, се проверува рејтингот на Фатмир Дехари, актуелен градоначалник на кичевската општина Осломеј.
Но тој не е конечен кандидат, бидејќи тоа ќе зависи од резултатите од анкетите.
Според изворот, не е чудно доколку во Кичево Советот на општината биде со мнозинство Албанци, а градоначалникот Македонец, или обратно, но се надева дека ќе биде избран достоен човек на таа функција, затоа што Кичево е многу важен македонски центар.
Сепак, негираше дека лидерот на партијата Али Ахмети би трчал за Кичево, на претстојните локални избори, затоа што таа функција е под неговото ниво и не е логично да се впушти во таква трка.
За Чаир, актуелниот градоначалник Изет Меџити ќе има предност пред партискиот портпарол Бујар Османи.
Изворот вели дека ќе се почитува хиерархијата – Меџити е потпретседател на партијата и ако тој сака да се кандидира повторно, тоа ќе биде земено во предвид.
Нашиот извор ги потврди информациите кои ги објавивме пред некој ден, дека за градоначалник на Тетово се прават анкети за угледот на Фатмир Бесими, Хазби Лика и неколкумина други, пишува „Макфакс“.
Во Гостивар најверојатно трката за градоначалник ќе ја води актуелниот министер за локална самоуправа и поранешен градоначалник на овој град, Невзат Бејта, но се опипува расположението на народот и за други кандидати како Талат Џафери, Аднан Јашари и Неџати Јакупи.
Сепак извори од ДУИ велат дека многу е рано да се излезе со конечни имиња, кои би требало да се тркаат за градоначалници во март 2013 година, за кога се закажани локалните избори.
OhridNews
извор: „Макфакс“
