Не очекувам од нашиот источен сосед и оваа влада да испрати поинаква порака. Сега тие мора пред нашите европартнери и партнери во НАТО да испратат порака и да рефлектираат реторика со којашто ќе нѐ обвинуваат нас, ние сме виновниците, а во суштина светот и Европа видоа која беше целта на бугарските политичари, рече премиерот Христијан Мицкоски, по пуштањето во употреба на целосно санираниот Музејот на вода во Заливот на Коските во Охрид, одговарајќи на новинарско прашање во врска со реакцијата на бугарските власти дека Македонија со својата реторика создава непријателска клима што влијае на евроинтеграциите.
Целта на бугарските политичари во ништо не се разликува од целта на руското раководство во Украина, а тоа е обид за асимилација на македонскиот народ и еден вид идентитетски инженеринг, нешто што најмалку треба да се случува во 21 век во Европа и тоа од земја членка во ЕУ која треба да споделува европски вредности. Наместо да подадат рака на Македонија, да нѐ поддржуваат во патот кон полноправно членство кон ЕУ, што е дел од Договорот за добрососедство, гледате тие имаат поинаква цел. И добро е што сите успеаа да видат и која е крајната цел дека не се неколку стотини македонски граѓани да бидат дел од Уставот, туку таа е многу подлабока и поопасна и за самата Европа, рече Мицкоски.
Според него, ЕУ го губи имиџот со Бугарија, поради однесувањето кое го има источниот сосед.
Н.С.Ј.
фото.А. Момироска
