„Иницијативата за формирање на локален младински совет“ денес со почеток во 16 часот во „Паркот на поезијата“ во Струга ќе го организира јавниот настан „Уморни од говор на омраза”. Настанот ќе биде исполнет со креативни работилници на кои младите преку улична уметност ќе учат за говорот на омраза и борбата против него.
-Целта на овој настан е преку уметност да се креира нов начин на комуникација и да се намали говорот на омраза во општеството, да се поттикнат младите да научат да го идентификуваат говорот на омраза, информираат организаторите.
Настанот „Уморни од говор на омраза“ е дел од проектот „Развој на локално младинско учество и локални младински политики”, финансиран од страна на Европската Унија, кој го водат Младинскиот образовен форум (МОФ) и Центарот за меѓукултурен дијалог (ЦИД).
Овој проект освен во Струга се реализира и во уште 11 македонски општини и е насочен кон младите луѓе, младинските организации, сите форми на младинско здружување и локалната самоуправа. Главната цел на проектот е да се зајакнат капацитетите на младинското здружување на локално ниво, нивно формално препознавање од страна на општините, како и заедничка работа за унапредување на младинските политики на локално ниво, преку развој на младински активизам, младинска работа и младинско учество во процесите на донесување на одлуки.
OhridNews
