Раководителот на Капетанијата на пристаништата во Охрид, Љупчо Настоски два дена по потонувањето на бродот „Илинден“ е недостапен за македонските медиуми. Влезната врата на Капетанијата е затворена, а вработените не даваат никакви информации.
Капетанијата не чувствува одговорност да ја информира јавноста за деталите од трагедијата која е последна во серијата несреќи што ова лето се случија на Охридското Езеро. Така беше и вчера пред и после состанокот на мешовитата меѓународна комисија за истрага на бродската несреќа што се одржа во Капетанијата.
Поради молкот на Капетанијата деновиве на јавноста и се сервираа бројни шпекулации околу бројот на патниците кои биле на кобното патување и капацитетот на бродот „Илинден“, па така и ресорниот министeр во првата изјава по несреќата изјави дека пловилото било регистрирано за 53 лица, а тоа има капацитет за 43 патници.
Бројни шпекулации имаше и околу неодамнешната несреќа кога во судир на два глисери во Охридското Езеро животот го загуби едно лице. Поради недостаток на релевантни информации и молк од Капетанијата во јавноста проструија голем број неточни информации кои одат на штета на истрагата и на инволвираните во несреќите, но и на имиџот на Охрид, кој по серијата трагични настани во езерото ова лето, е крајно нарушен.
Ohridnews
