Македонија е пример за соживот, меѓурелигиска и меѓуетничка толеранција, истакнаа претставниците на Македонската православна црква и на Исламската верска заедница на Втората конференција за меѓурелигиски и меѓуцивилизациски дијалог што се одржува во Охрид.
– Охридската конференција е од исклучително значење не само за верските заедници во Македонија, туку и за државата, затоа што на овој начин праќаме порака дека може на еден ваков начин да делува не само на регионот, туку и пошироко да се надминат конфликтите на различните религии и цивилизации, истакна митрополитот Петар.
Според реисот на ИВЗ, Сулејман Реџепи, со организацијата на Охридската конференција Македонија промовира и поттикнува дијалог меѓу религиите и различните култури и цивилизации.
– Сите проблеми и сите различности во светот можат да се надминат само по пат на дијалог. Друга алтернатива нема. Дијалогот треба да се промовира, да се развива и применува во практика и се надеваме дека заклучоците од Декларацијата што ќе биде усвоена во Охрид ќе ги применуваат сите верски заедници, истакна реисот Сулејман Реџепи, според кого Македонија промовира силни вредности кои можат да послужат како пример за другите земји во светот кои се мултинационални и мултиконфесионални- како Република Македонија.
Според Реџепи, токму дијалогот и толеранцијата ќе биде начинот преку кој ИВЗ, МПЦ и другите верски заедници во земјата и државата ќе ги затворат отворените прашања.
